हाम्रो बारेमा

स्थानीय समाजसेवी, बुद्धिजीविहरुको अथक प्रयास पश्चात मिति २०६७/०२/०९ मा स्थानीय समाजसेवी श्री रवि थापाज्यूको अध्यक्षतामा स्थानीय बुद्धिजीवि तथा शिक्षाप्रेमी श्री कुशुम न्यौपानेलाई संस्थापक प्र.अ. पदमा नयुक्ति गरी विधिवत रुपमा उद्घाटन गरी स्थापना गरिएको हो ।सोही वर्ष श्रावण महिनाको ५ गते कक्षा १ को अनुमति प्राप्त गरी कक्षा ५ सम्म सञचालन गर्ने लक्ष्य राखी स्थापना गरिएको थियो । यस विद्यालयको नामाकरण स्थापना कालमा नमुना प्राथमिक विद्यालय रहेको र यस विद्यालय सेवा क्षेत्र भित्र रहनु भएका स्थानीय शिक्षाप्रेमी श्री कृष्ण प्रसाद पौडेलज्यूले ईटालीमा रही कामको सिलसिलामा दिवंगत हुनुभएका उहाँका ज्येष्ठ सुपुत्र स्व. रामजी पौडेलको स्मृति विद्यालयको स्तरोन्नतिको लागि ३ कोठे पक्की भवन र ३३ थान डेस्कबेन्च हस्तान्तरण गर्नु भएकोले शिक्षा ऐनको नियमानुसार यस विद्यालयको नामको पछाडी राम थप्न मिल्ने व्यवस्था भएकोले प्रक्रियागत ढङ्गले विद्यालयको नाम मिति २०७५/०४/०१ गते देखि लागू हुने गरी श्री नमुना रामजी आधारभूत विद्यालय राखिएको हो ।

यो विद्यालय कञ्चनपुरको सदरमुकाम भिमदत्तनगरबाट करीब ६० कि.मी. दक्षिणपूर्व, कञ्चनपुर जिल्लाको दक्षिणी क्षेत्रको भारतीय सिमा बसही बजार सँग सिमाना जोडिएको तथा धनगढी उपमहानगरपालिकाबाट झण्डै १५ कि.मी. पश्चिमपट्टी पुनर्वास नगरपालिका वडा नम्बर ४ मा नमुना महिला सामुदायिक वनको काखैमा अवस्थित रहेको छ ।यस विद्यालयको उत्तरतर्फ IBRD बजार रहेको छ । हाल कक्षा ५ सम्म सञ्चालित यस विद्यालयमा दुई ओटा स्वीकृत शिक्षक दरबन्दी, एउटा राहत, दुई ओटा बालविकास दरबन्दी र एउटा कार्यालय सहयोगीको दरबन्दी गरी जम्मा ६ ओटा दरबन्दी रहेका छन् । यस विद्यालयमा बालविकास कक्षा (शिशु कक्षा) देखि कक्षा ५ सम्म पठनपाठन हुँदै आईरहेको छ । यस विद्यालयको सेवा क्षेत्र पुनर्वास नगरपालिका वडा नं. ४ रहेको छ । दलित समूदायको बाहुल्यता रहेको भएता पनि पछिल्लो समयमा ठकुरी समूदाय तथा बाहुन क्षेत्री समूदायको आकर्षण बढेको छ । स्थापना देखि हालसम्म धेरै चुनौती तथा समस्याहरु बेहोरिरहेको यस विद्यालयमा हाल ८० जना विद्यार्थीहरु रहेको छ । सेवा क्षेत्रका मानिसहरु अधिकांश गरीब, अशिक्षित र सामान्य स्तरका रहेका छन् । अधिकांश मानिसहरु गरीबीको रेखा मुनि रहेका छन्।सामाजिक चेतनास्तर विकासोन्मुख रहेको छ । विगतको तुलनामा वर्तमान समयमा यस समुदायका मानिसहरुमा धेरै परिवर्तनहरु आएको देखिन्छ ।